A historia de Rúas de ida, desenvolvida integramente en Galicia, segue os pasos de Miguel, un mozo que herdou un predio cun viñedo, mais que non está interesado no viño como negocio nin forma de vida. Aínda que a súa primeira idea é vender a propiedade, certos sucesos obrígano a demorar a transacción. Durante ese tempo de espera entra en contacto co seu novo entorno, coas súas xentes, os seus costumes e, sobre todo, con Marta e consigo mesmo. Desta forma, inicia unha viaxe inesperada que o leva a percorrer a comunidade galega, e coa que descobre que o viño é moito máis que a bebida que desfruta en compaña de Suso ou de Carlos, o enólogo emperrado en guialo por algunha rúa de ida...